Fødd: 7. juni 1866 på garden Arset, Sør-Brandal i Sande på Sunnmøre
Døydde: 10. mai 1937 i Rovde, Sunnmøre
Gravlagd: 15. mai 1937 på Åram kykjegard i Rovde i Vanylven, Sunnmøre

Foreldra til Mons Arset var gardbrukar Andreas Monsen Arset og kona Anne Pauline Amundsdotter fødd Sundsnes. Dei skapte ein kristen heim og hadde interesser for misjonen. Mons var eldstemann i syskenflokken. I unge år gjekk Mons på fylkesskule, og i 1885 tok han lærareksamen ved Stord lærarskule.

Mons Arset var nokre år lærar i Sirdal, på Kvamsøya, i Hallebygda og ei kort tid ved Voldens Høyere Almueskole. I 1889 fekk han så lærarpost i heimbygda, og her var han lærar i Sør-Brandal og Voksa krinsar fram til han gjekk av etter oppnådd aldersgrense. Han hadde og stillinga som kyrkjesongar og dreiv farsgarden på Arset.

Mons Arset hadde ei poetisk åre, og skreiv ein del. På grunn av helsa kunne han ikkje delta i hardt gardsarbeid, og fekk soleis tid til å skriva. Det som skin klårt fram i diktinga hans er kjærleik til heimen og fedrelandet i pakt med ei levande kristentru. Noko av det han skreiv, vart trykt i Stille Stunder og det kristelege ungdomsbladet Opp og Fram, men ein brann gjorde ende på manuskripta hans.

Fleire har tonesett songane til Mons Arset. Flest melodiar har komponisten Svein Møller laga. Far hans hadde Arset som lærar, og han dedikerte melodiane til far sin i takksemd over det som var ein del av røtene hans. Andre som har laga melodiar til songane hans er Johan H. Grimstad, Ragnar Ørstavik og Magnar Grøndal. Arset var representert i Nynorsk salmebok med salmen ”Vår einaste tilflukt”.

Utgjevingar:

1. Salmar og songar av Mons Arset, Sande kulturstyre, 1978

Salmar og songar:

1. Du lille blomst så skjær og skjønn
2. Eit strå seg tøyer trutt or mold
3. Fred med dei farne fedrar, som her budde
4. Guds kjærleik er som det store hav
5. Hver gnist av ånd, du nærte
6. Lat oss hugheile yrket vårt driva
7. Som bortkomne barnet i framande grend
8. Vår einaste tilflukt, vår tryggaste borg
9. Å, kan ei moder gløyma vekk

Kjelder:

• Kristen Sang og musikk
• Salmar og songar av Mons Arset, Sande kulturstyre, 1978, med notatar av Magne Vik Arset
• Nynorsk Salmebok
• Fottland: Songbok for ungdomsskulen
• Kyrkjebøker på Internett
• Gravminner i Norge 

Tilbake til hovudsida