|
|
|
|
 Johannes Barstad (1857-1931) Johannes Barstad var fødd i Volda i på Sunnmøre 7. april 1857. Han vart cand. theol. i 1883 og var ei tid lærar i Stavanger før han blei prest i Volda, Sunnmøre og på Voss. Barstad var med i nemnda som skulle vurdera Landstads reviderte salmebok. Han var engasjert i både målrørsla og i indremisjonsverksemd. Johannes Barstad ga ut det fyrste kristelege tidsskriftet på nynorsk, Stille Stunder som kom ut i 1889. I Norsk Salmebok finn vi fire salmar etter Johannes Barstad. Det totale talet er etter Rynning fjorten originale salmar og seks omsette. I Landstads salmebok er det elleve originale salmar av Barstad. Det er teke med fire omsette salmar av han. I den nye salmeboka som kjem ut i 2010, er Barstad representert med to salmar. Det var på Volda og Sunnmøre at Barstad kjende seg mest heime. Han vart kallskapellan i Volda i 1886 og frå 1900 sokneprest på same staden. Sidan var han prost Søndre Sunnmøre prosti. Men "åra kring 1890 var songen si tid på Sunnmøre", skriv Holsvik. Det gjekk store vekkjingar over bygdene og Barstad var aktiv med i vekkjingsrøsla. Og songen fylgde vekkjinga. Mange av nynorsksalmane som seinare kom med i salmebøkene, blei fyrste gongen publisert i bladet Stille Stunder. Frå 1919-1929 var Barstad sokneprest på Voss, men da han gjekk av for aldersgrensa, flytta han attende til Volda. Her døydde han i 1931. Barstad ligg gravlagd tett attmed Voldakyrkja. Utgjevingar: Kvæde (1904) Klokkeljod (1914) Salmar: 1. Stille, stille! Jesus lider, NoS 164 2. Eg ser deg, Gud, i kvar den blom som tirer, NoS 287 3. Til siger livsens fyrste dreg, NoS 519 4. Din Frelsar ser på deg i dag, NoS 664 Kjelder: Aanestad (1962), bd 1, sp 187-190 Aasmundtveit (1995), s. 86 Holsvik (1950), s. 153-155 Rynning (1967), s. 335-336 Salmelid (1997), s. 24-25 Stene (1933), s. 194-199 Johannes Barstad på Wikipedia |
|